S'arsa, s'arröbatta, se rinfranze,
cöre lesto sciû, verso da spiaggia
e za de nêuvo ö törna a spûmezzâ,
arsandöse e abbassandose,
ö mae mâ
Oua l'é verde, grossö, tömöltöso,
s'infranze in sce l'aenn-a con violensa,
se sente sordo o sêu romörezzâ
lazû in sce-i schêuggi,
ö mae mâ.
Oua o l'é limpido e azzûrro,
con fresche brixe che gh'increspan l'aegöa,
de remme ûn lento, lento sciabordâ,
e veie gianche filanti a l'orizzönte
ö mae mâ.
E gemme argentee, fregogge d'ûniverso,
e a lûnna a se respegia sbarassinn-a
mentre o gh'é e barche che van a-a lampâ
bonn-a pesca figgiêu
in sce-ö mae mâ.

A l'é 'na nêutte scûa,
ma quarche lampo
ö illûmina ö mâ
che-o l'é in borrasca.
Ö rimogögna ö trön
e quarche gössa
cominsa a callâ zû
da-o çe,
che-o pâ d'incioströ.
Poi, i lampi e-i troin
se fan sempre ciû scciassi,
scigöa oö vento
e láegoa a vegne zü
comme 'na seggia
da 'na bûgaixe
roversâ in tûn beo.
Che nêutte da tregenda!
in sce-o bricchetto
e ouive che se cegan
finn-a-a taera
e-o vento
che-o ghe sccianca
fêugge e ramme
e lampi e troin,
ö te pâ d'ese in göera
D'un traeto,
ecco sgöarase a cappa neigra
e 'na fetta de çe
taggiâ la in döi,
e 'na stella coriösa,
in meso a quella,
a göagia o mâ
che o se röbatta e-ö bögge.
Ma ecco,
in t'ûn momento,
arsâse a tramöntann-a
scöri ö libecciö
e nettezâ ö çe
da-e nivöe o calla ancon
quârche cingiann-a
e l'önda a-alenta
a-alenta, ciann-a, ciann-a.
Ö spönta ö sö,
lazzû, verso Arbissêua,
in sce l'aenn-a ûmia
ö gh'é l'örme di pe',
a l'ha lasciae,
passandö,
'na figgêua,
che-a va sercando,
la', 'n sce-o bagnasciûga,
ramette e legna
che-ö mâ
ä ha abbandönae

…a l’è chi a roba viva…


Fito, fito
a-a mattin presto
coi caretti careghè
e pesecelle mi vedeiva
pe-e stradde da çittae
con cascette de böghette
de frittûa, de seppiette
de tant’âtro pesce fin
da fâ a-o forno
o pe’ ö ciûppin
e poi totani,
laggioin,
mûsei
scörpene
cappoin

…miei che pesci donne…

Rento, rento
de-a mae câ
mi vedeiva ogni mattin
döe pescelle che descâse
rebelavan ûn carrettin
tanti gatti colorae
neigri, gianchi ma affamae
che gnaögnando a forsa sette
inseguivan o carretto
rimediando ûn bocconetto.
Ma da vei
Non ghe son ciû

…roba fresca, roba viva…

‘n’âtra fetta
Da mae Sann-a
che-a sparisce a se ne va,
ma in te öegge
restia sempre
a ciamatâ sotto câ

…pesci freschi donne…
…argento vivo…
…miei che pesci…

Stae fermi ûn attimin,
Fermaeve ûn po’,
Sentì,
a taera a tremma,
pâ quaesxi
che a se veugge
scröllà da addossö
ûn möndö de pighêuggi
che l’infestan.
Fermemmöse
Che, se nö
Riviemö prestö a-a fin.
L’aemmö stragiâ,
l’aemmö avvelenâ,
l’aemmö brûxiâ
in nömme dö prögressö,
in nömme dö stâ megiö
se semmö rögou ö dirittö
d’ese nöi i artefici,
i cörettöi,
i meistri,
Fermemmöse
Che, se nö
Riviemö prestö a-a fin.
A pâta che-ö Segnö
Cö-a saiva ö l’ha impastou,
A pâta che cö-ö sciou
Ö l’ha vivificou,
quello semmo nûatri,
e a taera
nostra möae
nostra semensa
a saiva e ‘n po’ de sciou.
Fermemmöse
Che, se nö
Riviemö prestö a-a fin.
Zâ ûnn-a votta, l’ommö
Nasciûö ne ‘n paradisö
L’ha faetö derrûà,
poi a natûa
a figgia dö Segnö,
n’ha daetö ‘na speranza,
e, de’n sce-ö Golgota,
aemmö avûö a prömissa
faeta da noströ Frae.
Fermemmöse
Che, se nö
Riviemö prestö a-a fin.
Quellö che faemmö a-a taera
L’è giastemmâ ö Segnö
Quellö che faemmö a-i ommi
L’è imprönta de Cain.
Ö sciöu e quella saiva
N’han reisö figgi e frae
Möae tarea a n’ha cödiö.
Perché allöa perché
Aemmö tûttö tradiö?
Fermemmöse
Che, se nö
Riviemö prestö a-a fin.

Sento che a s’avvixinn-a a passö leggiö,
Nö so quandö a riviâ, ma creddö prestö,
forse staiò dörmindo, forse saiò sveggiö,
a me diâ de segöila lestö lestö
Saiâ triste lasciâ e mae cose cae
Nö vedde ciû i amixi e a mae famiggia
nö vedde ciû i aöxelli sbatte e âe
nö vedde ciû ö mae mâ in sce-a battiggia
ma quandö aviò scöntou i mae peccheae
San Pè, forse, ö me ciammiâ lasciû
e de lasciû pöriö rivedde tûtti i mae
e staghe a lö vexin ancön de ciû
A vitta, se sa l’è stradda storta e dua
ma-a fin ö se riva a ‘na fiöria cianûa

Te caccian zû,
vegia çiminea,
toccö pe' toccö.
Tristemente
te veddö diventâ sempre ciû bassa.
Mi me regordö quandö,
da figgiêu,
zêugandö in tö ciassâ de l'öratoiö,
te vedeiva fûmâ,
mandandö a-ö çe fûmmö e vapöri,
che, cömme ûnn-oraziön,
pörtâvan in paradisö
ö sûö de tante schenn-e
e ö dö de tante brasse,
In tö förnö ardente
ö brûxiava ö carbön,
e, drentö a-i tûbbi,
ö cöriva a linfa
che-a intrâva in tûtte e câ.
Te caccian zû,
vegia çiminea,
toccö pe' toccö.
De nêutte,
quandö sön sölö
e fassö ö giö
pe' tûtta l'offiçinn-a,
passö davanti a-i förni smorti,
me pâ de vedde
squaddre de fantasmi,
che spâlan dö carbön,
che fan a carega,
fantasmi neigri da-a pöe
e lûstri da-ö sûö
veddö i vapöri
che sciordan da-a têu böcca...
Ma, poi,
a scena-a cangia,
te veddö ti,
mönca, silenziösa,
cön tûttö in giö i tocchi,
che quattro zöeni,
vegnûi da chissâ dönde,
han scc-iancou da-ö têu corpö.
Te caccian zû,
vegia çiminea,
toccö pe' toccö.
Cön ti
ö se ne vâ ûnn-epöca,
forse ciû povia
da quella che vivemmö,
l'epöca
che-ö s'andâva in bicicleta,
l'epöca
che-e distanse ean ciû lönghe,
l'epöca
che, quandö ö se scuörtiva,
ö se lasciava a ciave li,
söttö a-ö zerbin,
l'epöca
che, se tu parlâvi in dialettö,
te capivan,
che, da-ö pöggiolö,
ti cönversâvi cö-ö vexin de câ.
Oua cörimmö tûtti,
gh'aemmo tûtti sprescia,
nön se campimmö ciû,
nön gh'aemmö tempö,
gh'aemmö macchine, motö,
cönöscemmö a Svissera, a Germania,
e Arpi, i Apennin,
ö möndö intregö,
nön cönöscemmö chi ne sta vexin,
a-a porta a fiancö,
che importa,
l'è sölö ûn ommö...
Te caccian zû,
vegia çiminea,
toccö pe' toccö.

Son chi settou da 'n'öa in sce questo scêuggiö
co-a canna in man e o sgöardo in sce-o mattin,
tûttö ö l'é carmo e donde o riva lêuggiö,
ö nö vedde che mâ e çe tûrchin.
Na bâva d'aia a vegne da-o levante,
coi profûmmi do mâ e da campagna,
a sgrûggia lá in sce-o mâ, mörto distante,
'na nâve, i o pilotta ä l'accompagna;
döi garçonetti çercan de priette,
in sce-o sbattizzo 'na zöena a piggia ö sö
ûn vegio o se repesa de reiette
in sce 'n agaxo döi cömbi fan l'amö
Mia lá ö nattin, tia sciû che te ghe dan!
l'é n'aögiolinn-a, bönna comme o pan!

Passan, in te’n çe de peixe,
orribili fantasmi.
Miseia, famme e göera
cavarcan a braççettö,
e ghe fan cömpagnia
morti, rövinn-e e scandali.
Tûttö ö çe n’è scönvoltö
e nön se veddan
ne mancö stelle e lûnna.
Silensiö neigrö
Che t’accapönn-a a pelle!
Ma, eccö, ‘na campann-a
a fa’ sentì i sêu töcchi,
e ‘na stella splendente
a netta ö çe, a l’insciamma,
quindi a se ferma, a splende,
là, sörva a ‘na cabann-a.

L’è Pasqua Santa do Redentò
O l’è risorto nostro Segnô
Sente e campann-e comme dindann-an
Lasciû tra i bricchi, lazû in ta ciann-a.
I rondinetti son sotto-a gronda,
mille angioeti ghe fan a rionda.
Festa de paxe, festa d’amò
L’è Pasqua Santa do Redentò
L’è primmaveia, mille viovette,
in to çe gh’è solo poche nûvoette
Basta co-e ragge, basta co-i mori
Con e vendette, con i rancöri
Se semmo brûtti, oppûre belli
Se gianchi o neigri, semmo fraielli.
Festa de paxe, festa d’amò
L’è Pasqua Santa do Redentò
Demmose a man, comme i figgiêu
Demmo a letizia ai nostri chêu
Arvimmo e porte a l’aia a-o sô
A chi l’è allegro, a chi l’ha ûn dô
A chi o l’è ricco, a chi nö l’è
Cö mouto e o san, seggimo frae.
Festa de paxe, festa d’amò
L’è Pasqua Santa do Redentò

L'è nêutte, e 'nto silenziö,
röttö dai compressoi de l'offiçinn-a,
sön chi che veggiö,
e miando in gio,
mi veddo sempre e stesse cose,
telefono, relêuiö, cartellin
e 'n quaddro.
Un quaddro cön 'na fötögrafia,
ûn zöeno cön 'na faccia triste
l'è ûn morto,
massou 'n te l'âtra goera.
Mi nön l'ho cönösciûo,
ma o l'ea ûn frae,
ûn frae de tûtti quanti
che-o l'ha daetö a sêu vitta pe' nûatri,
pe' quella libertae che ciû de ûn
o çerca de robane.
Ma non e lascemmö fâ,
non permettimmo che a feccia
a törne a cömandâ,
pensemmö ai nostri frae
che tûtto han daeto pe' a nostra libertae,
pensemmö ai nostri figgi
che creddan in te nûatri
prönti, se necessaiö, a-ö sacrifiziö estremo
perchè nön segge,
'sto sangöe santö,
versou inûtilmente.

Dimme ûn pettin pöpâ,
cösse a l'è a libertae?
Ninin, a libertae,
son tante cose,
che a dile tûtte,
ghe vörieva 'na vitta,
e fosse anche de ciû.
Pensö de pörei di
che a libertae
o l'è rispettö,
rispettö a-o nostro proscimo,
a-e sêu idee, a-e sêu cose,
pe-ö verde, e bestie, e ciante,
e, sörvatûttö, rispetto pe' se stesci,
ese sempre prönti
a difende a propria dignitae,
e proprie idee,
senza prepotenze, senza abûsi,
ma senza debölesse,
questa, ninin, l'è libertae.

1944
Non cianze, no, ninin,
se anchêu me portan via,
se forse in sce 'sta taera,
non se vediemo ciû,
ti t'è l'ommö de câ,
e mi da-o çe
te faiò sempre cömpagnia,
fa cöraggiö a-a mömâ,
ûn giörnö se veddiemo,
pe' stâ pe sempre insemme
intantö ti e i têu figgi
viviei in te 'n möndö megiö.
Finiâ 'sta göera,
e queste berve,
camûffae da ommi,
da sta taera sparian,
sparian pe' sempre
e a libertae a saiâ
bella cömme 'na primmaveia
'na primmaveia de sciöe, de sö,
dönde tûtti se retrövian fraielli.
Non cianze, nö, ninin,
se anchêu me portan via.

1974
Ho centö, se, pöpâ,
ho centö quella votta,
ma poi, pensando ben
a quello che t'ae dito,
m'è nata in chêu a speranza,
e sön passae i anni
ûn, doi, vinti, trenta.
E oua, comme allöa,
tornan a fâse vivi,
i lûridi assascin
che con e bömbe
fan vittime innöcenti.
Ma a nostra libertae
che tanto sangoe santo
a l'ha per prexö
a non se töcca!
Nûatri che allöa gh'emmo,
e ch'aemmo avûo a vostra ereditae
non permettiemo mai a nisciûn,
a robâne o regallo ch'aemmo avûo,
e strenzendose insemme,
tûtti quanti,
saiemo sempre prönti
a ricacciâ in to ninte
chiönque o ghe prövesse.