Vêuggio parlâve da Befâna, e femmö finta che ö segge ö 5 zenâ dö 1938. E sci doman a l’è a Befâna e pe’ nûatri figgiêu a l’è forse ûnn-a de ciû belle feste de l’anno. Se pêu dì che-a segge anche l’urtima festa perché poi ö se retorna a schêua. E poi stanêutte passiâ a Befâna con tanti regalli pe’ i ciû bravi e pe-i âtri carbon. Staseia, allua, besêugna mettì a scarpa in sce-o ronfa e pende ‘na cäsetta sotto a-o camin. Intanto in ca fervan i preparativi pe-ö disnâ de doman. Raviêu, naturalmente, allua besêugna fa o pin, tiâ a pasta e poi cön a röetta. Intanto se da a consa a-e carni, ai pittantera e cosci via. A-a seia fito in letto perché se a passa a Befâna e s’è ancon desci, guai a-o mondo, a tia drito e ninte regalli. Quella nêutte, nûatri figgiêu emmö sugnou fantastiche cavalcate in sce de spassuie de vegie repessae con grossi nasi rebecûi e con grosci sacchi pin de roba bonn-a. A quell’epoca poi ö ghe n’ea anche ûnn-âtra Befâna che a l’ea quella ch’aveivan faeto iscrive a-ö partio e che ciamavân appunto “Befana fascista”. Ben questa lascemmola perde, non me son mai riuscio a immaginâ ‘na Befâna con a camixa neigra. A-a mattin, a momâ a non doveiva çerto ciamâne due votte. Zû da-ö lettö e de corsa in coxinn-a e... mäveggia! Törön, bomboli, reganissö, carbön döce, çinque franchi d’argento! Che Befâna ricca! Doppö ö disnâ, primma però de dorvì ö vin döçe faeto in câ, i figgiêu reçitavan a poesia da Befâna che aveivan imparou a schêua insemme a quella pe-o Bambin. Ben, non ghe crediei ma se sero i êuggi me pa’ ancön de senti mille voxi de mille babbanetti che dixan: “La Befana vien di notte con le scarpe tutte rotte col vestito alla romana viva, viva la Befana!”. Doman o doppo se saieva returnè tûtti a-a schêua e a vitta a l’avieva repiggiou ö sêu tran tran. Oua a Befâna l’han finn-a sfrattâ da-o sêu posto che a occupava da tanti anni in to lûnaio. Sta povia vegia tra antenne pe-a televixion, elicotteri, aereoplain de tûtti i tipi evidentemente a non pêu ciû xoâ. Però, però mi creddo che in ti sêugni di babbanetti, e credeime i babbanetti d’anchêu e de vei son sempre babbanetti, in ti loro sêugni, diva, a l’avieva posciûo beniscimo xoâ ancon pe’ tanto tanto tempo. Ma i nostri çervelloin han stabilio che i sêugni, a poesia a dev’ese eliminâ e coscì oltre a eliminâ a Befâna da-o lûnaio e-i han faeti retornâ a schêua proprio quellö giorno lì, pe’ fâli andâ, magari, in te de aule ma scadè. Pasiensa. Seremmo i êuggi e sentiemo e voxi de vei che ne ripettan: “La Befana vien di notte con le scarpe tutte rotte col vestito alla romana viva, viva la Befana”…