Le antologie da dömenega mattin - Pasqua
Pasqua "...a l'è a festa ciû bella de l'annö...", coscì o dixeiva o Claodin
in te l'antologia de Pasqua do 1978 che poei ascortà direttamente. Me scûso pe' a qualitae de l'audio che purtroppö l'è... quellö che l'è.
Ringrazio de chêu a Corale Alpinn-a Savoneise pè aveime permesso de mantegnì in
'sta registrazion d'epoca o ritornello de quella che a l'ea a sigla de a
trasmiscion, 'na casetta piccinn-a un po' vegia.
Quarche anno doppö, in te n'âtra Pasqua - che l'è staeta anche inseria in te
L'armanacco de Sann-a, - o Claodin o ne diva:
A Pasqua quartetti, torte, laitûghe pinn-e
abbondan davvei in tûtte-e coxinn-e.
Natâle con i têu Pasqua con chi ti vêu.
Questi, tra i tanti, son i pröverbi ciû significativi de Pasqua.
O primmo me riporta a-o climma
festösö, l'è giorno de resûrrezion, de rinascita, festa cristiann-a e festa de
natûa. Con o Cristö immolou in sce-a cröxe gh'è a sconfitta da morte, Cristö o
risorge! Cön ö plenilûniö de primmaveia gh'è a sconfitta da morte, ö gran
sötterou, mortö, o rinasce, ö diventa erba, o diventa spiga, l'è eternö triönfo
da vitta in sce-a morte.
O segondo pröverbiö ö me regorda che Pasqua a l'è primmaveia, l'è lûxe de sö e vive fêua,
in ta natûa, con tûtta a gente mentre ö Natâle, festa invernenga, se sta ben a-ö cadö dö tissön,
in te l'intimitae di nostri câi.
Cosse ö se favâ a Pasqua in ta
Sann-a de tanti anni fa? Cominsamo a preparâla in ta domenega de Parme, emö za
intrae in to climma. A mömâ a me preparâva pe-a procesiön do venerdi santö,
quella de casce, mentre za nuatri se dâmö da fâ pe' preparâ e êuve colorae pe
pasqua e pe' o merendin. Ean êuve de Pasqua poviae, êuve dûe de galinn-a cölörae
da nûatri figgiêu, ma quanta feliçitae quandö rivavân in toua!
A-o zêuggia santo vixita ai
sepolcri e procesion de cascette, faeta dai figgiêu. A-o venerdì quella de casce
faeta dai grandi, ma nûatri sbiri, vestii da-a angiöeti, gh'emo drento.
O Gloria ö sûnnava a-ö sabbo e se
lavamö ö môrin perchè l'aegöa l'ea beneita. A-a domenega tûtti in te l'oatoiö dö
Cristö Resortö a vedde o Santö Cristö calou da-a cripta.
Poi festa a toua e ö giörno doppo
tûtti a-o meendin, in ti prae, a çercâ quelle êuve colorae che nûatri figgieû
aveimo preparou e nascostö pe' festezzâ con ûnn-a caccia a-ö tesou ö lûnesdì do
merendin.
