Ouâ mi vêuggio parlâve dö mâ. Ö l'aviae dovûö esse o primmö tra i argomenti trattae, ma-o vösciûö lasciarlö ûn po' da-a parte perchè ö l'è ûn argomento immenso proprio comme o l'è immensö ö Mâ

Comme o se fa' quindi a parlâ do mâ, da donde o se cominsa? Dai oceani immensi, profondi e tömöltösi, animae da mille e mille creatûe, o da-e spiagge donde ti caminn-i a löngo in aegöe calme e ceppe che te rivan sölö a-e zenögge? O cöminsemmö dai ommi che a l'arböi partan in sce 'n gössö per l'eterna sfidda, pe' rancâ da-ö sêu corpö da vive, o parlemmö de chi, in sce-i barchi de lûssö, ö va in croxea pe' godise e mävegge de' arboi o di tramonti? O cominsemmo da-o figgiêu che, poco ciû in là dö sbatizzö, ö coströisce castelli d'aenn-a o ö fa di cöccolêui, o invece de chi, da l'arböi scinn-a a-o tramönto, passö doppö passö, sempre rincûlandö, a pe' descasci, in sce l'aenn-a che a scotta, ö tende a cengia rötölâ a-a çimma?

“Ûrlando foribondö”, ö dixe o Beppin da Cà,⁽¹⁾ “mâ in börrasca, raggia scadenâ” ö dixe ancön, ma 'sta börrasca in tà nostra taera a coinvolge tûttö, da-o mâ a-ö bricco e quello poco tempo che-a dûa, perchè e börrasche nön sön mai lönghe da nûatri, a börrasca l'è veramente 'na cosa infernale, aegöa e vento se mesccian, ö mâ o se franze crovindo, a traeti, con ö sêu romore, i creppi secchi e rotonati di troin, i lampi, comme lamme seghettae de lûxe, taggian ö scûo da nêutte che-a pa' quella d'ûn sabba donde tûtte e strie dö möndö se son daete ûn convegno; nêutte infernâle, e, o scigöâ do vento cö se rabela con e fêugge, ramme, papae, cö sbatte arvette, cö scarpenta i cöppi, o te pâ quaexi o diaö che da l'abissö o l'è möntaö da-e strie pe' fâ a riönda.

Ma poco dûa a Borrasca da nûatri, basta che se leve ûn po' de tramontann-a.

E poi, passâ a boriann-a da börrasca, ö tempö ö se mette a-ö bön, e ö giö di venti a regimme de brixa dan frescûa a-e câde giörnae, e ristorö in te longhe seiann-e estive. A natûa a ne regalla mille pröfûmmi portae da unn-arbaxia sotti, mille colori de l'arboi e do tramonto se respegian in sce-o mâ, ciömbin veiezzan pigramente quaexi ciurlandöse in sce-e correnti d'aia, che, pregne do profûmmo do mâ, montan a-o çe, atri ciombin, pösae in sce l'aegöa, se fan ninnâ dai maöxetti che se rincoran, che se rotolan, che se scontran con e lörö crestinn-e candide, allegri e biricchin comme vispi figiöeti, e i ciombin, cincianti in sce-o pei de l'aegöa, poan tante barchette a veia de figgiêu, pronte a partì pe' viaggi de avventûa e de sêugnö.

Quaexi 'na pigrizia a invadde tûtto quantö, a realtae a sfûmma oltre i confin da fantaxia e do sêugnö, i pori da pelle se dilâtan e, reixi ciû sensitivi e ricettivi, mille sensazioin ne investan, ne circondan, ne söbbaccan e, ö nöströ fixicö, intrego, ö reçeive messaggi che vegnan da mondi, da dimenscioin, da vibrazioin de ûnn-a fonte cosmica, infinia e eterna. Bönassa.

Ma se de giorno, cö-o tempo in candeia, cö a gran bönassa caressâ da leggie brixie, a fantaxia a cöre, se l'anima in estaxi a se distacca da-o mondo e-a s'incaminn-a in sce-i sentae do sêugno, in te seiann-e quando ö sö ö se scönde ma o çe ö se dipinze de tûtti i cö do rössö, de l'aranciön, do viola, do scarlattö e ö mâ ö ei respegia, quando se smorsa ancon de ciû a brixia che-a l'ha mescciou mille profûmmi insemme da-a ciann-a a-ö mâ, a-ö bricco, in te quello momento magicö, che-o separa o giorno e-a nêutte, a realtae e a foua, tûtto o diventa fêua da realtae, ö se vive in t'ûn sêugno a êuggi averti, in t'ûn attimo fêua da nostra dimescion, godindo de a natûa che-a me dà tûtti 'sti incanti.

E-e nêutti, in estae, pur essendo pinn-e de fascino son cûrte, e l'arböi, a levante, ö l'issa fitö e ö tinze çe, e ö l'è un rösseggiante scciaì. O cö do sangöe ö s'inceneisce e man a man che i menûti passan, e nûatri, che emö chi settae in sce l'aenn-a, in mûta contemplazion di mille riflessi d'argento do grande scenariö dell'öniversö reisö döggiö da-o respegiase in sce-ö mâ, ascistaemmö a-o miracolö, i cölöri cangian, cian cianin, innavertitamente, a-ö parpellâ de steie in sce-o mâ, a-ö respegiase de lûnn-a, ai diafani colori de-a breve nêutte, se stan facendo stradda i câdi cölori dö sö che caressando e aegöe, cangian i riflessi d'in argento in ou e, comme in ti prae fiorii, a natûa a se redescia, coscì in sce-o mâ, immenso prâ de azzûrro e verde e sêu farfalle risplendan, son veie gianche, lazzû a l'örizzönte, sön xoi de ciömbin che sfioran e aegöe, cömme 'na caressa, o che addirittûa pöan sospeise tra çe e mâ, tra realtae e sêugno.